कतार, २०२५ – कतारमा रहेका नेपाली समुदायलाई खेलकुद मार्फत एकताबद्ध गर्दै स्वस्थ्य जीवनशैली प्रवर्द्धन गर्ने उद्देश्यले पर्वत समाज कतारले जिल्ला स्तरीय भलिबल प्रतियोगिता आयोजना गर्ने भएको छ।
गैरआवासीय नेपाली संघ , राष्ट्रिय समन्वय परिषद् कतारको खेलकुद विभागको सहकार्यमा इस्लाम धर्मावलम्बीहरूको महान् पर्व इद उल फित्र तथा नेपाली नयाँ वर्ष २०८२ को अवसर पारेर प्रतियोगिता आयोजना गरिन लागेको हो।
प्रतियोगिता कतारको सानिया ५२ लेफ्ट साईड स्थित भलिवल ग्राउन्डमा गरिनेछ।
आयोजक समितिका अनुसार टिम दर्ता इद सुरु हुनुअघि नै पूरा गरिनुपर्नेछ, भने प्रतियोगिताका खेलहरू इदको पहिलो दिनदेखि सुरु गरिनेछ। टिम दर्ताका लागि आयोजक समितिले विभिन्न सम्पर्क व्यक्तिहरू तोकेको छ, जसका माध्यमबाट इच्छुक टोलीहरूले नाम दर्ता गराउन सक्नेछन्। टिम दर्ता शुल्क कतारी रियाल ३०० मात्र तोकिएको छ।
प्रतियोगितामा प्रथम, द्वितीय, तृतीय र सान्त्वना स्थान हासिल गर्ने टोलीहरूलाई नगद पुरस्कार, शिल्ड, मेडल तथा प्रमाणपत्र प्रदान गरिनेछ। पहिलो स्थान हासिल गर्ने टोलीले कतारी रियल तिन हजार पाच सय तथा शिल्ड, मेडल र प्रमाणपत्र प्राप्त गर्नेछ भने दोस्रो स्थान प्राप्त गर्ने टोलीलाई कतारी रियल दुई हजार तथा शिल्ड, मेडल र प्रमाणपत्र प्रदान गरिनेछ। यस्तै तेस्रो स्थान हासिल गर्ने टोलीलाई कतारी रीयल एक हजार तथा शिल्ड , मेडल र प्रमाणपत्र प्रदान गरिनेछ भने सान्तवना पुरस्ककार नगद करी पाच सय तथा शिल्ड , मेडल र प्रमाणपत्र प्रदान गरिनेछ ।
साथै, प्रतियोगितामा उत्कृष्ठ प्रदर्शन गर्ने खेलाडीहरूलाई विधागत पुरस्कारहरू समेत प्रदान गरिनेछ। उत्कृष्ट खेलाडी, उत्कृष्ट स्पाइकर, उत्कृष्ट डिफेन्स, उत्कृष्ट ब्लकर, उत्कृष्ट लिफ्टर र उत्कृष्ट सर्भर विधामा उत्कृष्ट ठहरिने खेलाडीहरूलाई विशेष सम्मान गरिनेछ। पर्वत समाज कतारका अध्यक्ष सन्तोष क्षत्रीले यो प्रतियोगिता प्रवासी नेपालीहरूबीच भाइचारा अभिवृद्धि गर्ने, खेलकुदको माध्यमबाट मानसिक र शारीरिक स्वस्थता बढाउने तथा नेपाली बिच अपनत्व झल्काउने अवसर हुने बताएका छन्। प्रतियोगितामा विभिन्न जिल्लाका खेलाडीहरूले सहभागिता जनाउने अपेक्षा गरिएको छ। आयोजक समितिले खेलप्रेमीहरूलाई खेल स्थलमा उपस्थित भई प्रतियोगितालाई सफल बनाउन आग्रह गरेको छ।
