दोहा – नेपाल आदिवासी जनजाति महासंघ कतारको दसौं महाधिबेशन हुने भएको छ ।
“पहिचान, पहुँच, प्रतिनिधित्व र समावेशिकरणको लागि, आदिवासी जनजाति अभियान,मुकुम्लुङ लगायत समस्त पहिचान आन्दोलनमा पुर्ण एक्यबद्धताको लागि महाधिवेशन”भन्ने मुल नाराका साथ दशौ महाधिबेशन हुने भएको हो ।
अप्रिल ४ तारिक शुक्रबारका दिन नेपाल आदिवासी जनजाति महासंघका केन्द्रिय अध्यक्ष गेल्जे शेर्पाको प्रमुख आतिथ्यमा हुने कार्यक्रमको तयारी अन्तिम चरणमा पुगेको आयोजकले जनाएको छ।
सनैया स्थित फुलवारी रेष्टुरेन्टमा बिहान ११ बजेबाट सुरु हुने कार्यक्रममा कतारमा रहेका स्थापित सामाजिक,वैचारिक तथा जातीय संघ संस्थाका प्रतिनिधि,पत्रकार,बुद्धिजीवी,समाजसेवी सम्पुर्णलाई उपस्थितिका लागि आयोजकले अनुरोध गरेको छ।
कतारमा नेपाल आदिवासी जनजाति महासंघमा नेपाल मगर संघ शाखा कतार,किरात याक्थुङ चुम्लुङ कतार,तमु (गुरुङ) समाज कतार,किरात राई यायोख्खा शाखा कतार,नेपाल प्रवासी तामाङ समाज कतार,थारु कल्याणकारिणी सभा कतार च्याप्टर,सुनुवार सेवा समाज शाखा कतार,प्रवासी भुजेल समाज कतार,नेवा पुचः कतार,माझी सेवा समाज कतार,नेपाली धानुक समाज कतार,शेर्पा संघ दोहा कतार,नेपाल प्रवासी दनुवार संगठन कतार र ताजपुरिया समाज कल्याण परिषद कतार गरि १४ वटा मातृ संस्थाहरु आबद्ध रहेका छन।
