दोहा, कतार
कोशी प्रदेश समन्वय परिषद्, कतारको चौथो अधिवेशन २०२५ तथा आठौँ स्थापना दिवस कार्यक्रम शुक्रबार सेनैयास्थित फुलबारी रेष्टुरेन्टमा भव्य रूपमा सम्पन्न भएको छ। अधिवेशनले रुद्र शर्मा आचार्यलाई निर्विरोध अध्यक्ष चयन गर्दै नयाँ कार्यसमिति गठन गरेको छ।
व्यानर अनावरण तथा दीप प्रज्वलन गरेर कार्यक्रम सुरु गरिएको थियो। त्यसपछि स्थापना दिवसको केक काटेर औपचारिक रूपमा कार्यक्रमको थालनी गरिएको थियो।
कार्यक्रमका सभापति परिषद्का निवर्तमान अध्यक्ष पदमकुमार घिमिरे तथा प्रमुख अतिथि संस्थापक अध्यक्ष चूडामणि कार्की रहनुभएको थियो।
कार्यक्रममा दोहामा स्थापित विभिन्न संघ–संस्थाका अध्यक्ष तथा प्रतिनिधिहरूको बाक्लो उपस्थिति रहेको थियो। नवनिर्वाचित उपाध्यक्ष रुद्र शर्मा आचार्यले स्वागत मन्तव्य राख्दै सम्पूर्ण अतिथि तथा सहभागीलाई हार्दिक स्वागत गर्नुभएको थियो।
कार्यक्रममा प्रस्तुत नौमती बाजाको तालमा सहभागीहरू उत्साहपूर्वक नाचगानमा रमाउनुभएको थियो। सोही अवसरमा कलाकारहरूले उत्कृष्ट सांगीतिक तथा सांस्कृतिक प्रस्तुति दिएका थिए। प्रस्तुति दिने कलाकारहरूमा खड्ग बस्नेत, सनिना दाहाल बस्नेत, ईश्वरी बस्नेत, सौरभ आचार्य, सल श्रेष्ठ, लक्ष्मी कार्की, अप्सरा राई, वर्षा लोप्चन, अजयकुमार दनुवार, नारायण देवकोटा र रोशन घिमिरे रहनुभएको थियो भने गजलकार पूर्ण कान्छा गुरुङको गजल वाचनले सभाहल तताएको थियो। संस्था स्थापनामा महत्वपूर्ण भूमिका निर्वाह गर्नुहुने व्यक्तित्वहरूलाई सोही अवसरमा सम्मान गरिएको थियो।
प्रमुख अतिथिले कार्यक्रम अत्यन्त सफल भएको र आगामी दिनमा नेपाली समुदायसँग हातेमालो गरेर अगाडि बढ्ने प्रतिबद्धता व्यक्त गर्नुभएको थियो। सभापतिले उपस्थित सम्पूर्णमा धन्यवाद ज्ञापन गर्दै आगामी दिनमा पनि यस्तै साथ र सहयोगको अपेक्षा गर्नुभएको थियो।
अधिवेशनले आगामी कार्यकालका लागि निम्न कार्यसमिति सर्वसम्मत रूपमा चयन गरेको छः
- अध्यक्ष : रुद्र शर्मा आचार्य
- वरिष्ठ उपाध्यक्ष : भीम बराइली
- प्रथम उपाध्यक्ष : गोपीकृष्ण अधिकारी
- द्वितीय उपाध्यक्ष : पदमप्रसाद सिम्खडा
- तृतीय उपाध्यक्ष : गोविन्द कटुवाल
- महासचिव : महेन्द्र उप्रेती
- सचिव : विष्णु निवौला, केशव बस्नेत, तोरण बस्नेत
- सदस्यहरू : सीपी गुरुङ, पेशल तामाङ, श्यामबाबु आचार्य, तेज न्यौपाने, खेमराज खड्का, सञ्जीव कटुवाल, भानु शर्मा, डिल्लीराम चौहान, शिवकुमार खत्री, सलबहादुर श्रेष्ठ, अनिता राई, कुबेर अधिकारी
कार्यक्रममा कोशी प्रदेशअन्तर्गतका विभिन्न जिल्ला समाजका प्रतिनिधिहरूको उल्लेखनीय उपस्थिति रहेको थियो। अधिवेशनले आगामी दिनमा प्रदेश समन्वय परिषद्लाई थप सुदृढ, व्यवस्थित र लक्ष्यउन्मुख बनाएर अगाडि बढाउने साझा प्रतिबद्धता व्यक्त गर्दै सम्पन्न भएको आयोजकहरूले जनाएका छन्।
