दोहा,
कतारमा बन्द प्रशिक्षणमा रहेको नेपाली राष्ट्रिय फुटबल टोली मैत्रीपूर्ण खेलमा ओमानसँग २–० ले पराजित भएको छ। कतारको दोहामा शुक्रवार बन्द रङ्गशालामा भएको खेलमा ओमानलाई जित दिलाउन ओमार अल मलिकसी र इसाम अल सुभीले समान एक/ एक गोल गरे।
नेपालले हाल एएफसी एसियन कप २०२३ को छनोटको तयारीका लागि कतारमा बन्द प्रशिक्षण गरिरहेको छ। ओमानसँगको खेलसँगै नेपालको बन्द प्रशिक्षणअन्तर्गत मैत्रीपूर्ण खेलको तालिका पूर्ण भएको छ । नेपालले कतारमा तीन मैत्रीपूर्ण खेल खेल्यो। जसको पहिलो खेलमा नेपालले टिमोर लिस्टेसँग २–२ को र दोस्रो खेलमा श्रीलङ्कासँग १–१ को बराबरी खेलेको थियो।
एसियन कप छनोटको समूह ‘ए’ मा रहेको नेपाल अब कुवेत प्रतियोगिताका लागि आज नै कुवेत प्रस्थान गर्नेछ। नेपालले ८ जुनका दिन जोर्डनसँग खेल्नेछ भने ११ जुनका दिन कुवेत तथा १४ जुनका दिन इण्डोनेसियासँग खेल्नेछ ।
#फोटो गोल नेपाल
