दोहा: नेपाली हिन्दू महिलाहरूको महत्वपूर्ण पर्व, तीज, यस वर्ष दोहामा भव्य रूपमा मनाइने भएको छ। प्रवासी नेपाली एकता मञ्च कतारको महिला विभागद्वारा आयोजित यो कार्यक्रमले नेपाली संस्कृतिलाई सम्मान गर्न र विदेशमा रहेका नेपाली महिलाहरूलाई एकताबद्ध गर्नको लागि एउटा विशेष अवसर प्रदान गर्नेछ।
कार्यक्रमको आकर्षणको केन्द्रमा चर्चित गायिका जमुना सोनमले आफ्नो प्रस्तुतिले सबैलाई मनोरञ्जन दिनेछिन्। “मेरा त बुढाले रक्सी खादैनन्”, “ओए सुन्तली”, “रेलैमा फरर” जस्ता लोकप्रिय गीतहरू गाएर प्रसिद्धि कमाएकी सोनमको उपस्थिति दर्शकहरूको आकर्षणको केन्द्र बन्नेछ।
नेपालबाट प्रमुख अतिथि रूपमा आउन लागेकी पूर्व मन्त्री र एकीकृत समाजवादी पार्टीकी नेत्री राम कुमारी झाँक्रीले तीज पर्वको महत्व र महिलाहरूको सशक्तिकरणबारे विशेष सम्बोधन गर्नेछिन्। मञ्चका अध्यक्ष मोहम्मद मुक्तदा मुसलमानका अनुसार, झाँक्रीको उपस्थितिले कार्यक्रममा अतिरिक्त गरिमा थप्नेछ।
सेप्टेम्बर ६ तारिखमा दोहाको होटल क्राउन प्लाजाको सभाहलमा आयोजना हुने यस कार्यक्रमले विभिन्न सांस्कृतिक प्रस्तुति, शुभकामना आदानप्रदान, र मनोरञ्जनात्मक गतिविधिहरू मार्फत नेपाली समुदायबीचको आपसी सद्भाव र एकताको सन्देश प्रवाह गर्नेछ।
कार्यक्रममा दोहामा रहेका सम्पूर्ण नेपाली संघसंस्थाका प्रमुखहरू, सामाजिक अभियन्ता, कलाकार, पत्रकार, र नेपाली समुदायलाई निमन्त्रणा गरिएको छ।
आयोजक प्रवासी नेपाली एकता मञ्च कतारको महिला विभागले यो कार्यक्रमले विदेशमा रहेका नेपालीहरूको आपसी सहयोग, संस्कृति संरक्षण, र एकता मजबुत पार्न महत्त्वपूर्ण भूमिका खेल्ने विश्वास व्यक्त गरेको छ।
