दोहा ,
कतारमा कोशी प्रदेश समन्वय परिषद्को समन्वयमा तथा परिषद्सँग आबद्ध नौवटा संस्थाहरूको संयुक्त आयोजनामा “विन्टर आउटडोर फेस्टिभल” भव्य रूपमा सम्पन्न भएको छ। नेपालकी चर्चित लोक तथा आधुनिक गायिका श्रेयसी चेम्जोङ लिम्बुको विशेष प्रस्तुति रहेको उक्त सांगीतिक कार्यक्रममा स्थानीय तथा नेपाली कलाकारहरूले मनमोहक प्रस्तुति दिएका थिए।
नेपालबाट विशेष अतिथिका रूपमा आमन्त्रित श्रेयसी चेम्जोङ लिम्बुले “मलाई तिम्रो सम्झनाले”, “सुने खबर जीवनसाथी अर्कै पाको छौ रे”, “पानी मिठो मेरो हजुर”, “मोहनी लाग्ला है”, “चोली राम्रो”, “जता हेरे पनि हजुर पुर्बै रमाइलो”, “रेली खोला बगर” लगायतका आधा दर्जनभन्दा बढी गीत प्रस्तुत गर्दै दर्शकलाई नचाएकी थिइन्। कतारमा आफ्नो प्रस्तुति राख्ने अवसर प्रदान गरेकोमा उनले आयोजकलाई आभार व्यक्त गर्दै आगामी दिनमा पनि यस्ता कार्यक्रमहरू निरन्तर भइरहोस् भन्ने शुभेच्छा व्यक्त गरिन्।
सांगीतिक कार्यक्रमका संयोजक गोविन्द कटुवालको व्यवस्थापनमा आयोजित कार्यक्रममा राष्ट्रिय लोक तथा दोहोरीगीत प्रतिष्ठान नेपाल, कतार शाखाले प्रत्यक्ष लाइभ दोहोरी प्रस्तुत गरेको थियो। सरिता वान्तावा राई, सृष्टि लामा, प्रिया तामाङ, कुमारी लामा, कविता राई मादेन, खड्ग बस्नेत र सौरभ आचार्यले उत्कृष्ट मारुनी नृत्य प्रस्तुत गरेका थिए। लक्ष्मी कार्की, अजय कुमार दनुवार, सुजन गुरुङ, एलिसा राई, गुना मगर “निशु”, मुन प्रसाईं, कमल दर्नाल लगायतका कलाकारहरूले नेपाली गीतहरू प्रस्तुत गरेका थिए। गोविन्द कटुवाल, प्रताप मुस्कान, एनआरएन आइडल २०२३ का विजेता निरु श्रेष्ठ, गायक रुस्तम तामाङले आ-आफ्नो सांगीतिक प्रस्तुति दिए।
कार्यक्रममा साहित्यिक माहोल पनि उत्तिकै आकर्षणको केन्द्र बन्यो। साहित्यकार शिव सुवेदी र प्रेम प्रसाद भट्टराईले मुक्तक तथा गजल वाचन गरेर दर्शकलाई साहित्यिक वातावरणमा डुबाएका थिए। विशेषगरी प्रेम प्रसाद भट्टराईको प्रेमिल मुक्तकहरूले प्रेम दिवस (भ्यालेन्टाइन्स डे) को माहोललाई थप रोमाञ्चक बनाएको थियो।
कार्यक्रमका प्रमुख अतिथि परिषद्का संस्थापक अध्यक्ष चुडामणि कार्कीले परिषद्ले आयोजना गरेको कार्यक्रम अपेक्षाभन्दा उत्कृष्ट र भव्य रूपमा सम्पन्न भएकोमा हर्ष व्यक्त गर्दै आयोजक समितिलाई धन्यवाद दिए। उनले कतारमा रहेका नेपाली समुदायलाई संगठित गर्दै यस्ता कार्यक्रमहरूले सांस्कृतिक पहिचान जोगाउन महत्त्वपूर्ण भूमिका खेल्ने बताए। कार्यक्रम संयोजक रुद्र प्रसाद आचार्यले स्वागत मन्तव्य राख्दै सम्पूर्ण अतिथि, कलाकार, आयोजक टिम तथा दर्शकलाई कार्यक्रममा उपस्थित भएकोमा धन्यवाद ज्ञापन गरे। गंगा विसी र जमुना विसीले “हामी नेपाली, हाम्रो नेपाल” बोलको गीतमा स्वागत नृत्य प्रस्तुत गरेका थिए।
कार्यक्रममा प्रदेशभित्रका जिल्ला संस्थाहरूका अध्यक्ष तथा कार्यक्रमलाई सफल बनाउन सहयोग गर्ने व्यक्तिहरूलाई मायाको चिनो प्रदान गरिएको थियो। साथै कार्यक्रममा सहभागी सम्पूर्ण कलाकारहरूलाई सम्मानपत्रद्वारा सम्मान गरियो। परिषद्का महासचिव पदम प्रसाद सिम्खडाले कार्यक्रमको सहज सञ्चालन गरेका थिए भने सभापति पदम कुमार घिमिरेले कार्यक्रम सफल बनाउन योगदान पुर्याउने सबैलाई धन्यवाद दिँदै औपचारिक रूपमा कार्यक्रम समापन गरेका थिए।
कार्यक्रममा एनआरएनए कतारका प्रथम उपाध्यक्ष कृष्ण पन्थी, परिषद्का सल्लाहकारहरू, प्रदेशअन्तर्गतका जिल्ला अध्यक्ष एवं प्रतिनिधिहरू, कतारका विभिन्न संघसंस्थाका प्रमुख तथा प्रतिनिधिहरू, पत्रकार, कलाकार तथा उल्लेखनीय संख्यामा दर्शकहरूको उपस्थिति रहेको थियो।
