दोहा । कतारस्थित नेपाली समुदायमा सामुयल सुनुवार (साम सुनुवार) नाम केवल एक संगीतप्रेमीको रुपमा होइन, एउटा समर्पित सामाजिक आत्माको रुपमा पनि गुञ्जिन्छ। हसिलो अनुहारभित्र अनगिन्ती पीडा लुकाएर सधैँ उत्साह बाँड्ने साम, कतारको नेपाली सांगीतिक क्षेत्रमा एउटा जीवित प्रेरणा हुन्।
नेपाल आदिवासी जनजाति महासंघ, एनआरएनए-एनसीसी कतार लगायतका प्रतिष्ठित संस्थाहरूसँग सक्रिय रहँदै उनले कतारमा नेपाली मौलिकता, संगीत र संस्कृति उजागर गर्न जीवन नै समर्पित गरे। २०२२ को विश्वकपमा भएका करिब सबै सांस्कृतिक कार्यक्रमहरूमा एनआरएनए-एनसीसीको सांस्कृतिक बिभागमा रहेर सामको अगुवाइ र सहभागिता विशिष्ट रह्यो। आफ्नो रोजगारी, समय र श्रमको ख्याल नगरेर भएपनी उनले नेपाली समुदायको सम्मानका लागि काम गरे — न तलब थियो, न भत्ता; थियो त केबल देशप्रेम, संस्कृति र समुदायप्रतिको समर्पण।
तीन महिनादेखि उनी गम्भीर रूपमा बिरामी परे, शरीरको आधा भाग पक्षघातग्रस्त भयो। लामो समयसम्म हमाद अस्पतालमा उपचारपछि अहिले उनी नेपाल फर्किएका छन्। यो यात्रा सजिलो थिएन, एनआरएनए कतारका कृष्ण पन्थी र उनको समूह र नेपाल आदिवासी जनजाति महासंघका राकेश श्रेष्ठ जस्ता सहयोगी हातहरूले अस्पताल र कम्पनीसँगको कानुनी प्रक्रिया सम्हाल्दै उनको फर्कने बाटो सहज बनाए। सामको लागि गरिएको सामूहिक सहयोग कतारको नेपाली समुदायको सहानुभूति र मानवीय संवेदनाको उदाहरण बन्यो।
तर यथार्थ यतिमै सीमित छैन। सामको परिवार आर्थिक रूपमा कमजोर अवस्थामा छ। आधा शरीर नचल्ने स्थितिमा नेपाल फर्किएका सामलाई उपचार र हेरचाहका लागि निरन्तर सहयोग आवश्यक छ। सामाजिक सञ्जालमा केही सहयोग अभियान सुरु भए पनि ती सीमित छन्। जसरी सामले समाजका लागि आफ्नै जीवन र परिवारलाई पछाडि पारे, आज त्यो समाजले सामको लागि एकजुट भएर ठूला कदम चाल्ने बेला आएको छ।
साम सुनुवारको कथा केवल एक व्यक्तिको संघर्ष होइन- यो प्रवासी जीवनभित्र लुकेको समर्पण, साहस र संस्कृतिप्रतिको माया को प्रतीक हो।
हिजो साम समुदायका लागि थिए, अब समुदाय सामको लागि हुनु पर्दछ।
