दोहा। कतारस्थित हामद मेडिकल कर्पोरेसन (एचएमसी) अन्तर्गतको विमेन्स वेलनेस एण्ड रिसर्च सेन्टर (WWRC) अस्पतालमा १७ वर्षदेखि हस्पिट्यालिटी सेवामा कार्यरत रेखा राई हजारौं बिरामी र आगन्तुकका लागि आत्मीयता र सहयोगको परिचय दिँदै आएकी छिन्।
तर सन् २०२५ सेप्टेम्बर २८ का दिन उनी स्वयं स्ट्रोकका कारण बिरामी भइन् र हमद अस्पतालको [Qatar Rehabilitation Institute(QRI)] कतार पुनर्स्थापना संस्थामा भर्ना गरियो। नोभेम्बर ६ मा डिस्चार्ज भएपछि उनले आफ्नो अनुभव सामाजिक सञ्जालमार्फत साझा गर्दै अस्पताल, सहकर्मी र कतार सरकारप्रति गहिरो आभार प्रकट गरिन्।
रेखा राईले लेखेकी छन् “म १७ वर्षदेखि यही अस्पतालमा काम गर्दै आएकी छु, तर बिरामी भएर भर्ना भएपछि मात्र यहाँको माया, सेवा र हेरचाहको वास्तविक मूल्य महसुस गर्न सकेँ। तपाईंहरूले मेरो मात्र होइन, मेरो परिवारको अनुहारमा पनि हराएको मुस्कान फर्काइदिनुभयो।”
उनले डाक्टर, नर्स, थेरापिस्ट, हाउसकिपिङ, किचन टिम, कम्पनी व्यवस्थापन तथा आफ्ना सहकर्मी बिरुष वाइबा लगायत सबैलाई धन्यवाद दिँदै कतारको जनस्वास्थ्य प्रणालीप्रति कृतज्ञता एवं प्रशंसा व्यक्त गरेकी छन् “कतार सरकारले जनस्वास्थ्यमा गरेको लगानी र समर्पण संसारकै लागि प्रेरणादायी उदाहरण हो।”
रेखा राई केवल एक सेवाभावी कर्मचारी मात्र होइनन्, उनी कतारस्थित नेपाली समाजकी अग्रणी महिला नेतृ हुन्। उनी नेपाली महिला समाज, कतारकी संस्थापक अध्यक्ष हुन्। त्यसैगरी, उनी संघीय लिम्बूवान सामाजिक मञ्च, कतारकी अध्यक्षका रूपमा समेत सक्रिय रहेकी छन्।
महिला हकहित, सामाजिक समानता र प्रवासी नेपाली महिलाको सशक्त प्रतिनिधित्वको अभियानमा उनी लामो समयदेखि नेतृत्व गर्दै आएकी छन्।
उनको योगदानले कतारमा रहेका नेपाली महिलाहरूबीच संगठन, आत्मविश्वास र सहकार्यको भावना बलियो भएको छ। उनले आफ्नो सामाजिक जिवनकालमा सयौं पिडित महिला कामदारहरुको उद्वार तथा सहयोग गरेकी छिन्।
१७ वर्षको वैदेशिक रोजगार एवं सेवायात्रा र अचानक आएको स्वास्थ्य चुनौतीपछि रेखा राईले दिएको सन्देश हजारौं प्रवासीहरूका लागि प्रेरणाको स्रोत बनेको छ। उनी भन्छिन् “सेवा, सहानुभूति र कृतज्ञता यी नै जीवनका साँचो औषधि हुन्। जीवनमा पाएको माया र सम्मान नै सबैभन्दा ठूलो उपचार हो।”
कतारका सामाजिक अग्रजहरु तथा आफन्त जनहरुबाट राईको स्वास्थ्य लाभको कामना गरिएको छ।
