ओमान— ओमानमा भइरहेको ICC T20 विश्वकप एशिया तथा इएपी क्वालिफायर २०२५ अन्तर्गत सुपर सिक्सको महत्त्वपूर्ण खेलमा नेपालले कतारलाई १४८ रनको लक्ष्य दिएको छ। कतारले टस जितेर फिल्डिङ गर्ने निर्णय लिए पनि नेपाली ब्याट्सम्यानहरूले २० ओभरमा ९ विकेट गुमाएर १४७ रनको चुनौतीपूर्ण योगफल तयार पारे।
नेपाली इनिङ्सको मुख्य आकर्षण कप्तान रोहित पौडेलको शानदार अर्धशतक रह्यो। उनले संयमित र आक्रामक ब्याटिङको मिश्रण गर्दै मात्र ४१ बलमा ५८ रनको महत्त्वपूर्ण पारी खेले। रोहितको ब्याटबाट ७ चौका र १ छक्का निस्किएको थियो।
यसअघि, ओपनिङमा आएका कुशल भुर्तेल (८) र आशिफ शेख (११) सस्तोमै आउट भए पनि कप्तान पौडेलले एक छेउ समालेर इनिङ्सलाई अगाडि बढाए। मध्यक्रममा दीपेन्द्र सिंह ऐरीले २२ बलमा २६ रन बनाएर रोहितलाई गतिलो साथ दिए। अन्तिम ओभरहरूमा गुल्सन कुमार झाले विस्फोटक ब्याटिङ गर्दै मात्र ८ बलमा २ छक्कासहित १६ रन जोडे भने सोमपाल कामीले पनि ९ बलमा १४ रन जोड्दै स्कोरलाई १४७ रनसम्म पुर्याउन सहयोग गरे।
कतारका लागि कप्तान मीरजा मोहम्मद बैँग्ग र ड्यानियल आर्चर लुइसले उत्कृष्ट बलिङ गर्दै समान ३–३ विकेट लिएर नेपाललाई ठूलो स्कोर बनाउनबाट रोके।
अब दोस्रो इनिङ्समा नेपाली बलरहरूको प्रदर्शन निर्णायक हुनेछ, किनकि T20 विश्वकपमा छनोट हुने सपना पूरा गर्न नेपाललाई यो खेल जित्नै पर्ने दबाब छ। नेपाली टिमका स्टार बलरहरूले १४८ रनको लक्ष्य रक्षा गर्न कस्तो रणनीति अपनाउँछन्, त्यो हेर्न बाँकी छ।
